Thursday, March 20, 2008

உலகிற்கு இறுதியாக வந்த இறைவனின் மகன் மூலமாகவே உலகிற்கு இரட்சிப்பு கிடைக்கிறது

உலகிற்கு எத்தனையோ இறை தூதர்கள், நபிமார்கள் அனுப்பப்பட்டு வந்த போதிலும் அவர்களை இறுதி வரை உலகம் அங்கீகரிக்கவி்ல்லை. அதனால் தான் இறைவன் மனிதனாக வரவேண்டி இருந்தது.

இறைவன் மனிதனாக வந்த பின்னர் மீண்டும் இன்னொரு தூதரை அனுப்ப வேண்டிய கட்டாயம் இறைவனுக்கு இல்லை. இறைவன் எவ்வாறு மனிதனாக வருவார் என்பதை எடுத்துக்காட்டும் நூலே யூதர்களின் நூல். அதுவே கிறிஸ்தவர்களின் பழைய ஏற்பாடு.

இறைவன் மனிதனாக வரப்போகின்றார் என்பதை எடுத்துக் காட்டிய பழைய ஏற்பாட்டு புத்தகங்கள் அதன் நிறைவேறுதலை புதிய ஏற்பாட்டில் வெளிப்படுத்தியது. அவ்வாறான வெளிப்படுத்தலோடு அந்த இறைவனின் உயிர்ப்பை இன்றும் நினைவு படுத்தும் புதிய ஏற்பாடு, மீண்டும் அவர் இறைவனாக சர்வ வல்லமையோடு வருவார் என தீர்க்கதரிசனமாக அறிவித்துள்ளது.

இறைவன் இவ்வாறு பாவிகளுக்காக மரித்து உயிர்த்த பின் மீண்டும் தமது தூதரை அனுப்புவார் என்பது ஏற்றுக்கொள்ள முடியாத கருத்தாக உள்ளது. அதனையே வேதாகமமும் வெளிப்படுத்துகின்றது.

இறைவன் மீண்டும் உலகிற்கு வரப்போவது பாவிகளை தண்டிக்கவே, அவர் வருவதை அவரை சிலுவையில் அறைந்தவர்கள் காண்பார்கள். அவரை கொடுமைபடுத்தியவர்கள் காண்பார்கள். அதுபோல் உலகில் பாவம் செய்து அதில் மூழ்கி இருப்பவர்களும் அவரை காண்பார்கள். ஆனால் அந்தோ பரிதாபம். அவர்களது பாவங்கள் அவர்களுக்கு இனி மன்னிக்கப்படாது. அதுவே புதிய ஏற்பாடு கூறும் உண்மையாக உள்ளது.

இறுதியாக அனுப்பப்படுபவர் இவர் தான் என இஸ்ரயேலர்களுக்கு நீண்ட காலமாகவே அறிவிக்கப்பட்டு வந்த இறைவனின் மகன் அதற்கான பழைய ஏற்பாட்டு தீர்க்கதரிசனங்கள் முற்றுமாக அவரில் நிறைவேறிய போதிலும் மோலோட்டமாக விளங்கியிருந்த யூதர்களுக்கு அவரது எளிமை ஏற்றுக்கொள்ளப்பட வில்லை. ஏனெனில் அரசராக அரச குடும்பத்தில் வருபவராக சித்திரிக்கப்பட்ட இயேசு அரச குடும்ப வம்ச வழியாக பிறந்த போதிலும் எளிமையான வாழ்க்கை காரணமாகவும் அரச ஆசை கொள்ளாதவராக இருந்ததாலும் யூதர்கள் அவரை ஏற்க வில்லை.

யூதருக்கு வெற்றியையும் சமாதானத்தையும் கொடுக்கும் வல்லமை வாய்ந்தவராக வருவார் என நம்பியிருந்த யூதர்களுக்கு அவர் கூறிய வார்த்தைகள் விளங்கவில்லை. அவரின் வார்த்தைகளுக்காகவே அவர்கள் அவரை வெறுக்கும் நிலையாக இருந்தது. காரணம் யூதர்களின் மறைமுக பாவங்களை அவர் அதிகாரமுள்ளவராக சுட்டிக்காட்டியதே. யூதர்களின் தவறான காரியங்களை வெளிப்படையாக சுட்டி காட்டினதால் அவர்கள் அவரை வெறுத்தார்கள்.

இன்றும் உலகியலில் உள்ளவர்கள் தங்கள் பாவங்களை சுட்டிக்காட்டும் கிறிஸ்துவிடம் திரும்பாததிற்கு காரணம் அவர்களின் பாவங்களே. தங்கள் பாவத்தை விட முடியாதவர்கள் கிறிஸ்துவிடம் வரமுடியாது. அவ்வாறு கிறிஸ்துவிடம் வராதவர்கள் கிறிஸ்துவின் 2வது வருகையில் கைவிடப்படுவார்கள். 2வது வருகையில் கைவிடப்படுபவர்களுக்கு பெரிய தண்டனை உண்டு என்பதை புதிய ஏற்பாடு வெளிப்படுத்துகின்றது. அதுவே நித்திய நரகம். எரிகிற அக்கினியில் தள்ளப்படுவார்கள். அங்கு இறுதியில் சாத்தானும் தள்ளப்பட்டு சாகமுடியாத அக்கினியிலே எரிக்கப்படும் நிலை.

புதிய ஏற்பாட்டில் கூறப்பட்டுள்ள நடைபெறப் போகும் சம்பவங்களை நம்ப முடியாவிட்டால் பழைய ஏற்பாட்டு தீர்க்கதரிசனங்களை எடுத்து வாசியுங்கள். அதில் என்றோ கூறப்பட்ட தீர்க்கதரிசனங்கள் கிறிஸ்துவின் காலத்தில் புதிய ஏற்பாடாக நிறைவேறின. பின்னர் புதிய ஏற்பாட்டில் கூறப்படும் தீர்க்கதரிசனங்கள் இனி வரப்போகும் காலத்தில் நிறைவேறப் போகின்றன. அவை நிறைவேறும் முன்னர் கிறிஸ்துவிடம் அடைக்கலம் பெற்றிடுங்கள்


No comments: